Acacia cornigera, el cornezuelo, cuernu de toru o cuyarina, ye un parrotal de la familia de les fabacees.
Esta especie puede algamar hasta 10 m d'altor. Tien escayos grandes, acovanaes escontra fuera (escayos dorsales axustares) que tán en pares na base de fueyes, que s'asemeyen a los cuernos d'un toru y son llixera o fuertemente cafés, delles vegaes marfil o marielles.
Les fueyes bipinnaes, con raquis principal de 12 a 14 cm de llargor, con 8 a 10 pares de fueyuques de 4 a 6 cm de llargu y peciolu acanaláu de 0,5 a 2 cm, cada fueyuca con 22 a 32 pares de pinnas de 3 a 7 mm de llargu y 7 a 17 mm ente par de pinnas. Inflorescencia n'espiga con flores sésiles de coroles marielles de 1,1 a 1,5 mm de llargu, llixeramente más llargues que la mota. Llegume color caoba, usualmente erecta, pola, 5 a 9 cm de llargor por 1,3 a 1,8 cm d'anchor, con ápiz puntudo. Semilla color pardu foscu con arilo blancusco.
Ye nativu del sur de Méxicu y Centroamérica. Distribúise per Belice, Costa Rica, El Salvador, Guatemala, Hondures, Méxicu, Nicaragua y Estaos Xuníos. Foi introducíu n'India y Paquistán.
Esta acacia ye conocida pola so rellación simbiótica coles formigues del xéneru Pseudomyrmex (P. ferruginea, P. belti, P. nigrosincta). Les formigues actúen como mecanismu de defensa pal árbol, protexéndolo contra inseutos y otros animales dañosos o contra plantes parásites. Les formigues habiten nos escayos buecos de la planta y aliméntense d'unos pequeños glóbulos ricos en glucóxenu (cuerpos de Belt) que son secretaos pol ápiz de los foliolos. El naturalista Francisco Hernández en 1651 foi'l primeru n'escribir sobre esta simbiosis, al referise a l'acacia llamada polos indíxenes huitzmaxalli.
Les especies del xéneru Acacia pueden contener derivaos de la dimetiltriptamina y glucósidos cianogénicos nes fueyes, les granes y la corteza, que la so ingestión puede suponer un riesgu pa la salú.[1]
Acacia cornigera describióse por (L.) Willd. y espublizóse en Species Plantarum. Editio quarta 4(2): 1080. 1806.[2]
Acacia: nome xenéricu deriváu del griegu ακακία (akakia), que foi dau pol botánicu Griegu Pedanius Dioscorides (A.C. 40-90) pal árbol melecinal A. nilotica nel so llibru De Materia Medica.[3] El nome deriva de la pallabra griega, ακις (akis, escayos).[4]
cornigera: epítetu llatín que significa "con cuernu" describiendo los escayos de la planta.[5]
.
Esta páxina forma parte del wikiproyeutu Botánica, un esfuerciu collaborativu col fin d'ameyorar y organizar tolos conteníos rellacionaos con esti tema. Visita la páxina d'alderique del proyeutu pa collaborar y facer entrugues o suxerencies. Acacia cornigera, el cornezuelo, cuernu de toru o cuyarina, ye un parrotal de la familia de les fabacees.
