Blunt Snouted Mullet

A Tréggia de fóndo opùre Cavón (Mullus barbatus Linnaeus, 1758), in ventemigliusu Treglia barbina, de fanfu^[1], a l´é 'n péscio do genere Mullus - Famìggia Mulidae, Òrdine Perciformi. Asémme â tréggia de schéuggio (Mullus surmuletus) o l´é o raprezentànte ciù conosciùo do génere into Mediterànio

Descriçión e diferénse tra Mullus barbatus e Mullus surmuletus

E trégge àn corpo alonghio sciacòu laterâmente, dòrso cùrvo, pansa ciatta, éuggi grendi, sott'a bócca picinn-a, an doî Barbiggi ch''ùzan pe çercâ o çibbo in sciô fóndo O colore o va da-o rósso vivo a-o giano öo; an dôe pìnn-e dorsali, a côa anpia e fòrcua, E diferénse tra e dôe menn-e en:

• A tréggia de fóndo a l´a a frónte ciù ripida, squæxi drîta -quélla do Mullus surmuletus a a l´é ciù inclinâ
• a l'à træ gròsse scagge sótta l'êuggio -o Mullus surmuletus ghe n´a dôe
• a pìnna dorsale a l´é sénsa cô -into M. surmuletus a l´a de strìsce rósse
• a longhessa màscima do Mullus barbatus a l´é de 20 cìtti -e trégge de schéuggio peuan êse ciù grendi, scinn-a 50 citti
• a tréggia de fóndo a l´é tìpica do Mediterànio -quella de schéuggio a s´atreuva ciù sovente inte l´Atlantico
• a tréggia de fóndo a vive in sciô fondo fangozo,sabia e bratta
• I ezemplâri grendi do Mullus barbatus trigan a na profonditæ scinn-a 300 mêtri -Mullus surmuletus o l´e ciù litorâle

Riproduçión

Tra a Primavéia-Estæ, e êuve protétte da 'na menbrann-a galezàn a o largo, i gianchètti cô bleu mæn fan vitta "Pelâgica". Man màn che cresciàn 4-5 cìtti ghe spunta i barbiggi, s'avixìnn-an a-a còsta cangian o cô in quello di adulti e se spostan in sciô fóndo.

Nómmi dialetâli e clàscici

• O nómme treggia (in nisàrdo Streglia) o vegne da-o grego τρίγλα. O filòzofo grêgo Aristòtele o l´a scrìto che vegnivan ciamae coscì percöse quésti pesci deponn-an e êuve træ votte l´ànno. Â giornâ d´anchêu o nómme scentìfico Triglidae, co-a famíggia Trigla -tra e âtre- o l´é asegnòu a pésci despægi di mullidae (a-o chèufano, l´imbriègo ecc.). Za o Rondelet o l´aiva conscideròu que quésti pesci, i atôali Triglidae, ean "autres especes de surmulets"^[2].A Ventimiglia un péscio da famíggi triglidae o vegne ciamòu co´n nómme ch´o-u métte in raporto coi mullidae: Cunpà d´a treglia - Trigla cuculus. L´é pe questa scimilitùdine tra questi pesci ch´o nómme Triglia o l´a finìo con êse aplicòu ai triglidae. Cuvier-Valenciennes, into capìtolo da seu Histoire des poissons donde parlan di triglidae, n´ou spiegan:

«Le nom grec de trigla {τρίγλη), aujourd'hui en italien trillia, appartient incontestablement au rouget-barbet, au mullus des Latins; mais Artedi avait réuni dans un même genre ce rouget-barbet, ce vrai trigla des anciens, avec les poissons dont nous allons parler: et lorsque Linnæus les sépara, il laissa au premier le nom de mullus, et transféra celui de trigla aux autres, contre l'usage le plus général des anciens.(..)»^[3]

• Pe o Paul Barbier o nómme latin Mullus o saieiva raprezentòu inte léngoe modèrne solo che da-o catalan Moll, e in cangio o nómme franzéize Surmulet e i nómmi di mûzai vegnieivan da-o paragón co-o mû:

«En résumé, on a: 1.-les dérivés du latin mullus tous savants à l´exception du catal. moll 2. les dérives du lat. mulus mulet, donné à divers poissons à grosse tête, considerés pour cela comme obstinés et stupides, et notammment aux poissons du genre mugil (...) sic. mulettu, fr. mulet, et (b) du genre mullus: fr. mulet (et surmulet)»^[4]

In cangio gh´é n´âtra teorîa ch´a dixe che surmulet o saieiva derivòu, lê ascì, de Mullus:

«edible type of spiny-finned fish, late 14c., molet, from Anglo-French molett (late 14c.), Old French mulet "red mullet" and directly from Medieval Latin muletus, from Latin muletus, moletus, from mullus "red mullet," from Greek myllos, name of a Pontic fish, which perhaps is related to melos "black" (see melano-)»^[5]

Cómme se sæ, i nómmi de Tréggia e di mûzai en squæxi pægi in franzéize e ingléize (surmulet/mulet; red mullet/grey mullet), e o Pierre Belon o l´aiva za dito che gh´éa o réizego de mescciâli^[6]: «Qui le nommeroit en François un Mullet, failleroit grandement, car tel nom eft deu au Cephalus: auffi eft ce pour cela qu'on le nomme Surmulet»^[7]

A Treccani, pr´ezénpio, a fa vegnî a pòula Mulétto 'mûzao' da Mullus 'tréggia'^[8], ma a fa derivâ Surmulotto 'tréggia' da Mulet, ch´o saieiva, dixan, o nómme do mûzao^[9]:

«mulétto2 s. m. [der. del lat. mullus, che indicava però la triglia; la stessa origine e trasposizione di sign. ha il fr. mulet]. – Nome livornese e siciliano di alcune specie di muggini» «surmolòtto2 s. m. [adattam. del fr. surmulet, comp. di sur- «sur-» e mulet «muggine», (..)]. – Altro nome della triglia di scoglio (Mullus surmuletus)»

Nòtte

1. ↑ Enrico Malan; Pesci e bestie de marina int'u parlà Ventemigliusu (2014)
2. ↑ Guillaume Rondelet: L´histoire entière des poissons (1558)
3. ↑ Cuvier-Valenciennes; Histoire naturelle des poissons Vol.4 (1829)
4. ↑ Paul Barbier; Noms de poissons (1911)
5. ↑ https://www.etymonline.com/search?q=mullet
6. ↑ Remenant sorra i etimologies
7. ↑ Pierre Belon; La nature et diversité des poissons (1555)
8. ↑ http://www.treccani.it/vocabolario/muletto2/
9. ↑ http://www.treccani.it/vocabolario/surmolotto2/