She lus sheer-vio blaaghey 'sy chynney Rosaceae eh bossan argid ny duillag argid (Argentina anserina). T'eh dooghyssagh da'n lieh-chruinney Hwoaie, er claddeeyn as lheeantyn dy mennick. V'ad cliaghtey cur eh 'sy ghenus Potentilla, agh rish ny 1990yn hug ad eh stiagh ayns Argentina.[1]
She lus lussagh injil t'ayn. Ta ny sthollaneyn snauee jiargey echey gaase wheesh as 80cm er lhiurid. Ta duillagyn rea-fedjagagh 10-20cm er lhiurid echey, as ny duillageenyn 2-5cm er lhiurid as oirr tonnagh oc. Ta fynney sheeidagh bane er duillagyn, gish as sthollaneyn. T'adsyn bun ennym cadjin y lus. Ta blaaghyn buighey ec bossan argid, dagh fer ny lomarcan er gass 5-15cm er yrdjid; t'eh 1.5-2.5cm er crantessen. Ta queig dys shiaght petyllyn oc. She dhossan dy acheneyn çhirrym eh y mess oc.
Ta tey jeant jeh fraueyn bossan argid. V'ad cliaghtey gra dy row bree castey folley chammah's bree noi pian bolgey, glassey keeilley as ymmodee çhingyssyn beill. Ren ad ymmyd jeh'n lus noa noi brasney moon, as poodyrit noi çhingys craaee. V'ad cur ushtey drigit y lus er y chrackan noi brick ghreiney, pluccanyn as daah ny greiney.[2]
She lus sheer-vio blaaghey 'sy chynney Rosaceae eh bossan argid ny duillag argid (Argentina anserina). T'eh dooghyssagh da'n lieh-chruinney Hwoaie, er claddeeyn as lheeantyn dy mennick. V'ad cliaghtey cur eh 'sy ghenus Potentilla, agh rish ny 1990yn hug ad eh stiagh ayns Argentina.
